Ezekiel 27

1¶ Tok bilong Bikpela i kam gen long mi, i spik, 2Nau yu, pikinini man bilong man, kirapim wanpela krai sori bilong Tairas. 3Na tokim Tairas, O yu husat i stap long ai bilong biksi, husat i wanpela bisnisman bilong ol manmeri bilong planti ailan, GOD Bikpela i tok olsem, O Tairas, yu bin tok, Mi stap naispela tru i inap tru. 4Ol hap arere bilong yu i stap long namel bilong ol biksi, ol kamda bilong yu i bin mekim naispela tru bilong yu kamap inap tru. 5Ol i bin wokim olgeta plang bilong ol sip bilong yu long ol diwai fir bilong Senir. Ol i bin kisim ol sida bilong Lebanon long wokim ol mas bilong sip bilong yu. 6Long ol ok bilong Basan ol i bin sapim ol pul bilong yu. Ol lain bilong Asur i bin wokim ol fom bilong yu long aivori, dispela ol i bringim ausait long ol ailan bilong Kitem. 7Ol laplap i naispela tru i gat gutpela bilas i kam long Isip em i dispela samting yu opim sel bilong yu long en. Blupela na purpelpela bilong ol ailan bilong Ilaisa em ol dispela samting i karamapim yu. 8Ol lain i stap long Saidon na Arvat em ol boskru bilong yu bilong sip. Ol saveman bilong yu, O Tairas, husat i bin stap insait long yu, em ol man bilong yu bilong bosim stia. 9Ol lapun tru bilong Gebal na ol saveman bilong en i stap insait long yu ol man bilong yu bilong putim git. Olgeta sip bilong biksi wantaim ol boskru bilong ol bilong sip i stap insait long yu bilong holimpas ples bilong kago bilong yu. 10Ol bilong Persia na bilong Lut na bilong Put i stap long ami bilong yu, ol man bilong yu bilong bikpela pait. Ol i hangamapim plang na hat ain insait long yu. Ol i soim klia fit tru bilong yu. 11Ol man bilong Arvat wantaim ami bilong yu i stap antap long ol banis bilong yu raun nabaut, na ol lain Gamadim i stap insait long ol taua bilong yu. Ol i hangamapim ol plang bilong ol antap long ol banis bilong yu raun nabaut. Ol i bin mekim naispela tru bilong yu kamap inap tru. 12Tarsis em i bisnisman bilong yu bikos i gat planti tru kain mani samting, wantaim silva, ain, tin, na led, ol i wokim bisnis wantaim ol man long ol bikpela maket bung bilong yu. 13Javan, Tubal, na Mesek, ol i ol bisnisman bilong yu. Ol i wokim bisnis long salim ol man yet na ol sospen samting bilong bras long maket bilong yu. 14Ol bilong hauslain bilong Togarma i wokim bisnis long ol bikpela maket bung bilong yu wantaim ol hos na ol man i ran long hos na ol miul. 15Ol man bilong Dedan em ol bisnisman bilong yu. Planti ailan em kago bilong han bilong yu. Ol i bringim wanpela presen long yu long ol kom bilong aivori na eboni. 16Siria em i bisnisman bilong yu bikos yu gat planti kago tru bilong salim bilong yu, dispela yu wokim. Ol i holimpas ples long ol bikpela maket bung bilong yu wantaim ol emeral, purpelpela kala, na naispela bilas, na laplap i naispela tru, na koral, na ageit. 17Juda, na hap bilong Isrel, ol i ol bisnisman bilong yu. Ol i wokim bisnis long maket bilong yu long wit bilong Minit, na Panak, na hani, na wel, na marasin bilong sua. 18Damaskas em i bisnisman bilong yu long ol planti kago tru bilong salim bilong yu, dispela yu wokim, bilong olgeta planti mani samting tru, long wain bilong Helbon, na waitpela gras bilong sipsip. 19Dan tu na Javan i go i kam i holimpas ples long ol bikpela maket bung bilong yu. Ain i lait, kesia, na kalamas i stap long maket bilong yu. 20Dedan em i bisnisman bilong yu long ol klos i dia tumas bilong ol karis. 21Arebia, na olgeta hetman bilong Kedar, ol i holimpas ples wantaim yu wantaim ol pikinini sipsip, na ol man sipsip, na ol meme. Long ol dispela ol i ol bisnisman bilong yu. 22Ol bisnisman bilong Siba na Reama, ol i ol bisnisman bilong yu. Ol i holimpas ples long ol bikpela maket bung bilong yu wantaim ol nambawan bilong olgeta spais, na wantaim olgeta ston i dia tumas, na gol. 23Haran, na Kane, na Iden, ol bisnisman bilong Siba, Asur, na Kilmat, em ol bisnisman bilong yu. 24Ol dispela em ol bisnisman bilong yu long olgeta kain samting, long blupela klos, na klos ol i bilasim, na long ol bokis i gat ol naispela klos i dia, dispela ol i pasim wantaim ol baklain, na wokim wantaim sida, namel long kago bilong yu. 25Ol sip bilong Tarsis i bin singim stori bilong yu long maket bilong yu. Na yu bin pulap gen, na yu kamap pulap wantaim glori tru insait long namel bilong ol biksi. 26¶ Ol man bilong yu bilong pul i bin bringim yu long ol bikpela wara. Is win i bin brukim yu insait long namel bilong ol biksi. 27Ol planti mani samting bilong yu, na ol bikpela maket bung bilong yu, ol kago bilong yu, ol boskru bilong yu bilong sip, na ol man bilong yu bilong bosim stia, ol man bilong yu bilong putim git, na ol lain i holimpas ples bilong ol kago bilong yu, na olgeta man bilong bikpela pait bilong yu, husat i stap long yu, na long olgeta lain bilong yu husat i stap insait long namel bilong yu, bai pundaun i go insait long namel bilong ol biksi long dispela de bilong bagarap olgeta bilong yu. 28Ol ples arere bilong biktaun bai seksek long nois bilong singaut bilong ol man bilong yu bilong bosim stia. 29Na olgeta husat i yusim pul, ol boskru bilong sip, na olgeta man bilong yu bilong bosim stia long biksi, bai kam daun long ol sip bilong ol, ol bai sanap antap long dispela hap. 30Na ol bai mekim ol man long harim nek bilong ol i birua long yu, na ol bai krai wantaim bel i pait tru, na ol bai tromoi das antap long ol het bilong ol, ol bai tantanim ol yet insait long ol sit bilong paia. 31Na ol bai mekim ol yet i kamap kela olgeta long tingim yu, na pasim ol yet nabaut wantaim bek laplap, na ol bai krai tru long tingim yu wantaim bel i pait tru na krai wantaim singaut wantaim bel i pait tru. 32Na long krai wantaim singaut bilong ol, ol bai kirapim wanpela krai sori long tingim yu, na krai sori antap long yu, i spik, Wanem biktaun em i olsem Tairas, olsem dispela i bagarap olgeta insait long namel bilong biksi? 33Taim ol kago bilong salim bilong yu i go ausait long ol biksi, yu pulimapim planti lain manmeri. Yu bin mekim ol king bilong dispela graun long kamap maniman wantaim ol planti mani samting tru bilong yu na ol kago bilong yu. 34Long dispela taim, taim ol biksi bai brukim yu insait long daunbilo bilong ol wara, ol kago bilong yu na olgeta lain bilong yu i stap insait long namel bilong yu bai pundaun. 35Olgeta lain i stap long ol ailan bai kirap nogut long yu, na ol king bilong ol bai pret tru, ol bai soim wari bilong ol long pes bilong ol. 36Ol bisnisman namel long ol manmeri bai wokim nois bilong daunim long yu. Yu bai stap wanpela samting bilong pretim man nogut tru, na yu bai i no inap olgeta long stap moa liklik.